Duke përfshirë stilet dhe qëllimin, këto ndërtesa mahnitëse dëshmojnë, se nuk janë vetëm shfaqjet e organizuara brenda tyre, ato që mund të konsiderohen art.
Përveç estetikës mahnitëse, nuk ka asnjë element të veçantë, që përcakton apo bashkon teatrot më të bukur në botë. Disa janë shekullorë, disa më pak se një dekadë.
Një pjesë e vogël kanë stile të pasura dhe të zbukuruara të shekullit të 19-të, të tjerat me forma dhe sipërfaqe të lëmuara të epokës moderne.
Shumë prej tyre nuk kanë as të njëjtin qëllim: Teatrot në këtë listë janë teatrot e operës, sallat e koncerteve dhe madje edhe kinematë.
Në vazhdim renditen disa nga teatrot më të bukura në botë.
Salla e Koncerteve Walt Disney (Los Angeles, Kaliforni)
Shtëpia e Filarmonisë së Los Anxhelosit, Salla e Koncerteve Walt Disney, u projektua nga Frank Gehry dhe u përurua në vitin 2003.
Struktura gjithëpërfshirëse është një shembull i përmendur shpesh i arkitekturës dekonstruktiviste dhe konsiderohet si një nga mjediset më të sofistikuara akustike të performancës në botë.
Palau de la Música Catalana (Barcelona, Spanjë)
Danny Lehman/Getty Images
E vendosur në Barcelonë, Palau de la Música Catalana është një shfaqje mahnitëse e dizajnit katalanas Art Nouveau.
E ndërtuar sipas vizionit të arkitektit Lluís Domènech i Montaner, struktura fillimisht ishte projektuar për një shoqëri korale, Orfeó Català. Teatri mahnitës u shpall një vend i Trashëgimisë Botërore të UNESCO-s në 1997.
Palacio de Bellas Artes (Mexico City, Meksikë)
Arkadij Schell/Getty Images
Një nga qendrat kulturore më të njohura në Meksikë, Palacio de Bellas Artes ka pritur një shumëllojshmëri programesh, duke përfshirë shfaqje arti, kërcimi dhe teatrale.
Një ndërthurje e stileve të ndryshme arkitekturore, duke përfshirë art deco dhe neoklasik, ndërtesa u projektua nga Adamo Boari dhe Federico E. Mariscal dhe përmban dekorime të brendshme, që përshkruajnë bimë meksikane, jetën e kafshëve dhe maska nga traditat parahispanike.
Opera Garnier (Paris, Francë)
Yang Liu/Getty Images
E ndërtuar në kohën e Perandorit Napoleon III, Opéra Garnier – e njohur edhe si Palais Garnier – është një teatër opere me 1979 vende, në Paris.
I projektuar nga Charles Garnier, teatri u imagjinua në “stilin Napoleon III”, i cili përmban një koleksion zbukurimesh dhe elementesh, që të kujtojnë arkitekturën baroke të Rilindjes Palladio.
Fasada përmban një koleksion skulpturash të frymëzuara nga tema të tilla si “harmonia”, “muzika instrumentale” dhe “vallëzimi”. Të ftuarit mund të gjejnë gjithashtu buste të kompozitorëve të famshëm si Beethoven, Mozart dhe Rossini midis kolonave të pjesës së jashtme të përparme.
Teatri i Madh Harbin (Harbin, Kinë)
CHEUNGHYO/Getty Images
Kthesa të mëndafshta të Teatrit të Madh të Harbinit, mund ta bëjnë atë të duket si diçka nga një film fantastiko-shkencor, por ndërtesa e jashtëzakonshme nuk është produkt i një ëndrre shpresëdhënëse.
E projektuar nga MAD Architects dhe e hapur në vitin 2015, qendra me shumë vende përfshin një teatër madhështor, teatër më të vogël dhe salla të shumta provash.
Raj Mandir (Jaipur, Indi)
Atlantide Phototravel/Getty Images
Raj Mandir, një kinema e madhe në Jaipur, ka qenë mjedisi i shumë premierave të filmave Hindi.
Struktura e stilit Art Deco është projektuar nga W. M. Namjoshi dhe përmban një koleksion zigzagësh dhe formash asimetrike në fasadë.
Shtëpia e Operës së Sidneit (Sidnei, Australi)
Walter Bibikow/Getty Images
Ndoshta asnjë teatër nuk është aq i njohur sa Teatri i Operës së Sidneit. Me një linjë të veçantë çatie, që duket më shumë si vela, struktura konsiderohet lehtësisht si një kryevepër e dizajnit bashkëkohor.
Megjithatë, teatri, i projektuar nga arkitekti danez Jørn Utzon, ka gjithashtu një histori dramatike, që përfshin kostot të skajshme ndërtimi, duke e shtyrë Utzon të largohej nga projekti. / Monitor
