Janë vetëm disa pije që duhen konsumuar në ditë të nxehta. Nuk mund të pijmë çdo lloj pasi do të kishim më tepër etje. Uji duhet të jetë i pandashëm, pasi zëvendëson bindshëm çdo pije tjetër. Çaji edhe i ngrohtë hidraton më tepër, ndërsa kola më mirë të evitohet
Uji vetëm natyral
Në ditët e nxehta të verës uji mbetet pija e parë që duhet konsumuar. Sa më shumë gota në ditë aq më mirë do të ndiheni gjatë aktiviteteve. Dietologët këshillojnë një litër e gjysmë në ditë, por nëse do të konsumonit më tepër se kaq do të bënit shumë mirë. Uji në verë duhet të jetë i pandashëm, edhe kur dilni duhet të merrni një shishe me vete. Iu ndihmon të hidratoheni dhe të ndiheni më të lirshëm. Por kujdes, pini ujë natyral dhe jo të gazuar.
Lëngje frutash
Ato që e zëvendësojnë ujin janë sigurisht frutat. Konsumoni sa më tepër të tilla. Nëse do merrnit lëngun e tyre në formë të shtrydhur do të ishte një zgjedhje më e mirë për trupin tuaj, i cili në ditë të tilla ka vërtet nevojë për lëngje. Konsumoni lëngje frutash të ndryshme, por të bëra vetë sepse lëngjet e gatshme kanë përmbajtje të lartë sheqeri. Lëngjet duhet të kenë sa më pak sheqer, sepse vetëm kështu nuk do të keni etje.
Çaji, edhe i ngrohtë
Çaji është një tjetër pije që duhet konsumuar në ditë të nxehta. Zakonisht tendenca është që pije të ndryshme të shoqërohen me shumë akull ose të jenë shumë të ftohta. Por në fakt akulli nuk i bën mirë organizmit i cili është i djersitur. Nëse do të konsumonit çaj të ngrohtë trupi juaj do të hidratohej më lehtë dhe do të ndiheshit më i freskët. Kjo është provuar edhe në vende të nxehta si në shkretëtirë, kur çaji i ngrohtë i bën mirë organizmit. Nëse nuk iu pëlqen i tillë mund ta pini edhe të freskët por jo me akull.
Kola, më mirë jo
Pijet me gaz janë ato të cilat duhen refuzuar. Sepse nuk i bëjnë mirë organizmit. Duket sikur të largojnë etjen por në fakt e shtojnë më tepër atë. Një prej tyre është edhe koka kola. Është pija që shumë fëmijë por edhe të rritur parapëlqejnë të konsumojnë. Në fakt kola ka në përbërje të saj shumë gaz dhe sheqer, pikërsht dy prej elementëve që nuk i bëjnë mirë trupit në ditë të nxehta. Për më tepër koka kola ndikon në fryrjen e stomakut si dhe në formimin e celulitit.
Një birrë po
Nga ana tjetër birra është pija që edhe pse ka një përqindje të vogël alkooli këshillohet të konsumohet. Një gotë birrë në ditë është më se e këshillueshme edhe nga shumë dietologë. Ajo forcon kockat, përmirëson metabolizmin, sistemin imunitar dhe për më tepër të freskon dhe largon etjen. Një gotë birrë mund të shijohet mjaft mire, sidomos në vaktin e drekës e shoqëruar me pjatën tuaj.
